kuk der an doen dak van nature zo wantrouwig zien
dak meestoal joarn nodig en voe vertrouwen in e vrouw te vien
dak, nie zomo moatn worden want sommige moatn zien
in stoat voer olene mo te focusen op de foute dingn

en, de tied daw en gekregen is beperkt
dus ek gin tied voe t’investeren in e levensloos gesprek
woarin da menshn ander menshn reduceren tot object
of woadat om beurts stoefen is met een of ander event

o we, mekoar niet te zeggn en, bluv ek liever
in me kot chilln olene in plekke me’t 5de wiel
an de conversoatiewagen te voeln,
want ik uiten me ziel, en kriegn just e mismakelijk gevoel

van de reactie, wien gift er echt om wa daj vertelt
en is nie just ant wachtn voe deel te neem an d’interactie
soms merk ek dak zelve tevele toe wiln voegen
ok in e gesprek zien, in plekke van me rustig bie de groep te voegen

tis nie omdat er ossan e twa ku gezeid wordn
dak telkens me mening moe no voorn duwn owe brainstorm
soms zit de kracht in open rumte te creëeren
in plekke van elke lege seconde te converseren

da wit ek, mo toch ist nie gegeven
of vanzelfsprekend dak me gedragen volgens de zaken dakke weten
mo k’proberen, van me gedrag te analyseren
te reflecteren over oe dak me soms manifesteren

ok in e groep zien… want olene stoa je nergens
dus een egocentrische benoadering bluft je beperken
en tis werken, an wederzijds begrip en accepteren
daw e kleine rol in e groter geheel representeren

we zien schakels, connecties, en kmoen gin filosoof zien,
voe te zien dak soms Idioot zien lik Dosjtojevski
mo t’leven is e kanse voe te groeien, te geven
dus vergif ek iedereen en ok ook mezelvn et verleden


…kan ossan gepeisd dat leven vlag en wimpel wos
dat simpel wos, in de sjakose, mo minder wos
de woarheid… hetzelfde gezicht mo der wos minder gloss
en elke zomerpla van in me droomn werd in realiteit e winterkost

…kan ossan gepeisd dat leven vlag en wimpel wos
dat simpel wos, in de sjakose, mo minder wos
de woarheid… hetzelfde gezicht mo der wos minder gloss
en elke zomerpla van in me droomn werd in realiteit e winterkost


kuk der an doen dak van nature energetisch zien
ot de reste stille volt, dak nog ant bewegen zien
nie ossan de regels respecteren mo rebelerend zien
…en dak mezelvn af en toe mor amper werevien

kuk der an doen dak van nature e verteller zien
… soms ziek e viswuf, kzoen kun kabouter kwebbel zien
soms kuk me moend nie oedn en lat ek weinig plekke vrie
voer ander perspectief en voel ek nie dak et ant trekken zie

kuk der an doen van nature wa verwarrend zien
… nie ossan open me gedachten oedek clandestien
soms wa chaotisch, mor ik peizn voer e man of tien
en dus ist nie zo simpel voer e richting in me plan’n te vien

kuk der an doen dak van nature terughoudend zien
… e klein ertje die soms bezig wos me foute dingn
… dak me homies vaak nie durven up e fout te wiezn
omdak nog zelve teveel fouten maken voe vertouwn te kriegn

kuk der an doen dak van nature et natuurlijk
niet natuurlijk vien da wieder kappen en dat de natuur verdwient
kuk der an doen dak soms nie doen wa dak moen doen
of kuk olene mo proberen, kom et ollemale goed?


…kan ossan gepeisd dat leven vlag en wimpel wos
dat simpel wos, in de sjakose, mo minder wos
de woarheid… hetzelfde gezicht mo der wos minder gloss
en elke zomerpla van in me droomn werd in realiteit e winterkost

…kan ossan gepeisd dat leven vlag en wimpel wos
dat simpel wos, in de sjakose, mo minder wos
de woarheid… hetzelfde gezicht mo der wos minder gloss
en elke zomerpla van in me droomn werd in realiteit e winterkost