me raps zien een expressie van elementaire drang
de connectie met me blad is een innig, precair verlangn
voe me zelvn uit te drukken in symbolisch vernuft
der is gin visionaire klank nodig, hoogstens e vlucht
van status quo’s, en e te grote binding met de ratio
tussen hamer en aambeeld verdwijn ek in scenario’s
gevangen in et moment, afhankelijk van pen en blad
bewandel ek de grens tussen massa en de mens
met de dag, vultrek ek de verbale transmutoatie
van me leven, onderhevig an bepaalde grannuloatie
korrelt en borrelt de energie tope toet filament
woarut dak metaforen kneden en strofes da niemand kent
toet up et punt woarup dak ze kristalliseren
en me gevoelens en me gedachten assimileren
zodak moeiteloos men eigenste krachten manifesteren
die m’in stoat stellen voer iets woarachtig te kunnen creëren
ol ist nie ossan trending, of bie ieder populair
zorgt et soms voer e Copernicoanse wending
want tis wereldbeeldveranderend en revolutioniar
achter t’lezen zet je zeven stappen evolutionair
et soort teksten die etwien ze zicht veruimen
ol wos et de revolutionibus orbium coelestium
tis monumentaal, lik sculpturen van Bernini
en tis mijln verwijderd van de naburige rendities
tis puur up intuïtie, kzien voortdurend up e missie
lik Da Vinci is et letterlijk figuurlijke precisie
dak ier bolwerken, elk vers e klasse apart
me rol sterken als verteller toet e gat in de nacht
e nocturnale dromenvanger die mor amper moe maffn
ik zien e krak in me vak dus gok van de hak no de tak
zoender dak et overzicht verliezen, kzien omnipresent
in me schrijverszone onbloot ek ol me verborgen talent
voe zoverre dak ik kunnen gok ik mee met de stroom
en toch doek ik men eigen ding, ik zie nie heteronoom
ik schrijven et type flows dat ze proberen te klonen
want ze zien geometrisch prachtig lik zeeanemonen
voe zoverre dak ik kunnen gok ik mee met de stroom
en toch doek ik men eigen ding, ik zie nie heteronoom
ik schrijven et type flows dat ze proberen te klonen
want ze zien geometrisch prachtig lik zeeanemonen
soms is us leven e droom, vul met ludieke, unieke
fluïde, lucide momenten, nie volledig synchroon
met de normale gang van zaken, ik straaln up lange dagen
ok met taal en klank de lagen in verhaaln omvangrijk maken
gin rem up me motor der inspiroatie
kwerpn licht up verloren communicoatie
ken respect voe de vorige generoatie
pioniers die papier nie versieren met onnozele gebrekkige nodeloze creaties
als luisteroar verdwaal je in me narratieve helix
mo je pikt de droad wel up want me gedachten zien symmetrisch
up elkander ofgesteld, t'karakter is poëtisch
ieder liene is besprienkelt met de assen van e Feniks
Ze passen in me thesis, oenderhevig an verassende cohesie
assan geometrisch, nie plastisch, synthetisch
mor authentiek en origineel
alfabetisch vorm ek strofes toet e kloppend geheel
soms ziek’t subject da direct vo jen ogen hangt
soms ziek anwezig up e plek woadaj me nie woarnimt ol wossek e hologram
af en toe ziek ik onzichtboar, mor ist doar
up e plek van leegte da me raps manifesteren als onmisboar
je zoe moe weten oeveel ki’s dak no me schrift stoarn
zoveel verloren tracks dak en die potentiële hits woarn
de afstand da me pennepunt et ofgeleid
deurheen de latste 2 decennia volt enkel ut te drukkn in lichtjoarn
voe zoverre dak ik kunnen gok ik mee met de stroom
en toch doek ik men eigen ding, ik zie nie heteronoom
ik schrijven et type flows dat ze proberen te klonen
want ze zien geometrisch prachtig lik zeeanemonen
voe zoverre dak ik kunnen gok ik mee met de stroom
en toch doek ik men eigen ding, ik zie nie heteronoom
ik schrijven et type flows dat ze proberen te klonen
want ze zien geometrisch prachtig lik zeeanemonen
Samoerai is a MC that lives Hip-Hop 24/7! Check out some of the tracks on my channel and visit www.phatmark.be for more dope music! Peace & Love to all!