der zien 10.000 verhalen in West-Vloanderen, en dit ist er mor 1
t’verhaal van e baby die bluft schremen
der zien 10.000 verhalen in West-Vloanderen, en dit ist er mor 1
t’verhaal van e baby die bluft schremen


Sarah zit er hele deure, zis gekrakt
ze slapt ol moandnlange max 3 euren per nacht
vorig joare wos ze zwanger, twos de max
mo dat eur droom e nachtmerrie ging worden at ze nie hele verwacht

eur zeuntje ligt van snuchtens vroeg toet savonds loat te bleiten
en der zien nie vele menshn in d’omgeving die kunnen elpen
hij wordt olene rustig bie ze mama, da zien feiten
mo toe nog ligt ie de meeste tijd te krijsen

ze kan et nie mir an, ze werkt e 5 up 7 in e bank
en et nog 2 andere kids die eur troost en liefde verlangn
mo ze zit ol fftjes zoender, eur vint probeert te elpen
mor et chronisch slaapgebrek doet eur motivoatie verwelken

vandaag is weer azo, Nathan is hysterisch
en gelijk wa da ze doet, der is geen magische remedie
ze zoe zelve soms wiln krijsen want et dreigt van eur te nekken
soms wit ze niemi goed oe lange da zet nog goa trekken


der zien 10.000 verhalen in West-Vloanderen, en dit ist er mor 1
t’verhaal van een onbegrepen kleinen
der zien 10.000 verhalen in West-Vloanderen, en dit ist er mor 1
t’verhaal van een onbegrepen kleinen


Ryan lat ze woare zelvn biena noois zien
durft ol niemi bleïten omdat niemand em komt troosten biedn
nis 7 mo soms liekt ie ol e manneke van 12e
deur ol de miserie die em deur et leven et bedolven

zen ouders ziej olene mo met em communiceren
deur te roepen en te tieren, of deur em te negeren
elke dag at ie lik liever in ze bedde gebleven
sommige dagen et ie zest ol gin goeste mi voe te leven

mo nis 7, daj kuj toch nie begrijpen of accepteren
oe dat iemand zukkn klein manneke verder bluft kleineren
matjes roend em zien olene mo de woede en frustroatie
dat ie thuis nie kut ontloaden deur de stroeve situatie

de meeste peisn zest dat ie et overdrieft
mo je ziet et zeer oj efftjes rechte in zen ogen kiekt
ne wit niemi wa te doen of woarom dan zem nie begrijpen
dus ie bluft ze woare zelvn onderdrukken en ontwijken


der zien 10.000 verhalen in West-Vloanderen, en dit ist er mor 1
t’verhaal van e tiener up de been
der zien 10.000 verhalen in West-Vloanderen, en dit ist er mor 1
t’verhaal van e tiener up de been


Thomas makt nie rappe moatn, ne zit vaker up ze zelvn
ne spendeert ze tied met diepe in et internet te delven
ne verglijkt em met de menshn dat ie ziet up social media
en voelt em zo onzeker, net nog noois een echte lief gehad

elke morgen stoart ie lange in de spegel
peizend dat ie nie genoeg is, ze zelfbeeld is beneveld
iedereen in zen omgeving lijkt gelukkig en tevreden
zelve peist ie soms an zelfmoord en nie te moetn leven

nis 17 en ne kampt ol met depressie
bie ze psychioater et ie om de poar weken e sessie
mo ze lieken nie te helpen, want niet liekt te veranderen
ne vergelijkt ze zelvn olle dagen met de anderen

en niemand ziet et want hij oedt et goed verborgen
tlatste dat ie wilt is iemand die voer em zoe moetn zorgen
want hij peist dat ie nie werd is, dus bluft ie der mee zittn
elke dag geweune wachtend upt moment dat ie goa pittn


der zien 10.000 verhalen in West-Vloanderen, en dit zien der mo 3
t’verhaal zoe van iedereen ku zien
der zien 10.000 verhalen in West-Vloanderen, en dit zien der mo drie
t’verhaal van iedereen, van ik en gie

der zien 10.000 verhalen in West-Vloanderen, dit zien der mo 3
t’verhaal zoe van iedereen ku zien
der zien 10.000 verhalen in West-Vloanderen, en dit zien der mo drie
t’verhaal van iedereen, van ik en gie